Miðgarður

Þá er ég loxins kominn hingað en ég hef ekkert getað bloggað vegna þess að a) ég var ekki með netsamband í íbúðinni, og b) ég hef verið að koma mér fyrir og er enn að. Þetta er þó allt að koma en enn er eftir að taka upp úr nokkrum kössum og koma innihaldinu fyrir. Reyndar er einn kassinn bara fullur af snúrum; fjöltengi, framlengingar og þannig. Það verður bara geymt einhversstaðar. Svo á ég enn eftir að koma upp heimabíókerfinu en vegna þess að ég finn ekki fæturnar fyrir hátalarana (sem eru einhversstaðar útí skúr í Baughúsum) hef ég ekki enn farið í að tengja það.

Þannig að ég er nokkurn veginn búinn að koma mér fyrir, bara eftir að setja upp gluggatjöld og ganga frá örfáum hlutum og þá er allt tilbúið.

Ég hef ekkert skráð mig inn á MSN síðan ég fékk netið (í gær) vegna þess að ég hef einfaldlega of mikið að gera í þessu stússi hérna og hef ekki efni á að missa úr tímann.

Annars drapst stóra tölvan á mig þegar ég kom hingað, veit ekkert hvað er að. Þannig að nú er ég að vinna í gegnum fartölvuna með stóra skjáinn tengdan við hana (sumsé með tvo skjái). En sú tölva er næstum því orðin sex ára og ekkert alltof afkastamikil, en þetta verður að vera svona í smástund til viðbótar. Ég var búinn að skrá routerinn minn hjá HÍ en það var ekki að virka, þannig að ég skráði netkort fartölvunnar og það virkaði – en þetta er eitt enn sem ég þarf að kippa í lag við tækifæri.

Ég hendi inn myndum síðar, en annars eru framundan þrjár ritgerðir og lestur – það mun ganga fyrir.